Pahayag ng PLM sa SONA 2017 PDF Print E-mail
Written by Partido Lakas ng Masa   
Thursday, 27 July 2017 18:42

HARANGAN ANG DIKTADURA!

WAKASAN ANG MARTIAL LAW!

 

 

 

KINOKONDENA ng PLM (Partido Lakas ng Masa) ang desisyon ng buong Kongreso na ipagpatuloy ang martial law sa Mindanao hanggang katapusan ng Disyembre ngayong taon.

 

Sa botong 261-18, nanaig ang mayorya ng mga trapo na tagasuporta ni Pangulong Duterte. Wala pang 5 porsyento ng Kongreso ang tutol sa martial law. Isang rubber stamp na lamang ang Kongreso. Wala tayong maaasahan sa isang Kongreso na pinaghaharian ng mga trapo at ng mga nagmula sa angkan at dinastiya na matagal nang nagpapahirap sa bayan.

 

Sa isang salita, bomoto ang Kongreso sa pagpapaigting ng gyera sa Mindanao bilang solusyon sa problema ng terorismo doon. Pero isa itong gyera na sa halip masugpo ang terorismo ay kikitil pa ng maraming buhay ng mga sibilyan at sundalo at sisira sa mga syudad at kabuhayan ng masa doon.

 

Ang makikinabang lamang sa gyera ay ang rehimeng Duterte at mga kapanalig nito. Ang bentahan ng armas ay malaking negosyo na pinagtutubuan ng malalaking korporasyon ng armas at pinagmumulan ng kickback para kay Duterte, sa AFP, at mga kasabwat ni Duterte.

 

Naninindigan kami na hindi martial law ang solusyon sa terorismo sa Mindanao. Ang ugat na kailangang bunutin ay ang kahirapan at pagsasamantala sa Bangsamoro at ang kawalang-hustisya sa kanilang kalagayan. Kailangang ipagkaloob ang tunay na otonomiya at sariling paghahari nila sa Mindanao. Ito ang batayan ng peace talks sa MILF, MNLF, Lumad, at iba-iba pang grupo doon. Kung matutugunan ito, magkakaroon ng payapang Mindanao at payapang Pilipinas, kung saan ang lahat ng Pilipino, Moro at katutubo ay magtutulungan para mapaunlad ang buong bayan.

Ang hinaharap ng  masa

Sa loob ng isang taon, ang buong adyenda ni Duterte ay nakalatag na. Sa pulitika, ito ang paggamit ng kamay na bakal para wasakin ang lahat ng oposisyon sa kanyang paghahari. Ginagamit ang gyera sa droga at gyera sa terorismo – at ang pwersa ng pulis at militar – para mapahigpit ang tangan niya sa poder.

 

Ngayong Oktubre, nakatakang i-postpone ng rehimeng Duterte ang barangay elections at sa halip, i-aapoint ang kanilang mga alagad bilang mga pinuno ng barangay. Bago matapos ang taon, ipatutupad ang pagbabago ng Konstitusyon (ChaCha) sa ilalim ng Constitutional Assembly (Con-Ass) ng sunud-sunurang Kongreso.

 

Sa pamamagitan ng Con-Ass, ipatutupad ni Duterte ang pagbabago ng Konstitusyon (ChaCha) na magpapalit ng pamahalaan tungong federalismo. Isang federalismo kung saan ang lokal na gobyerno ay paghahati-hatian ng kanyang mga alagad na trapo. Kapag binuksan ang ChaCha, tatanggalin din ang lahat ng mga probisyong nagpuprotekta sa ating ekonomiya, gaya ng 60-40% equity ng mga korporasyon pabor sa Pilipino at ang pagbabawal sa mga dayuhan na magmay-ari ng mga lupain sa Pilipinas.

 

Kasama ring tatanggalin ang lahat ng limitasyon sa pagdedeklara ng martial law na nakasaad sa Konstitusyon. Sa gayon, maliwanag ang direksyon ng lahat ng ito. Ito ay para manatili sa poder si Duterte at ang kanyang mga bataan na hayok sa kapangyarihan.

 

Kontra-masa rin ang mga pang-ekonomiyang patakaran ng rehimeng Duterte. Pangunahin dito ang pagpapataw ng ibayong VAT at consumer tax sa ilalim ng kanyang Tax Reform Program; ang public-private partnership program (PPP) sa ilalim ng islogang “Build, Build, Build” na ang kikita lamang ay ang mayayamang kakutsaba ni Duterte sa negosyo – ang San Miguel, Henry Sy, mga Chinese corporations, at ang Chinese government na kikita nang malaki sa mga pautang. Lahat ng mga ito ay babawiin sa mataas na toll ways ng mga korporasyon at sa mataas na buwis sa masa!

 

Anong dapat gawin?

Nananawagan kami sa progresibong pwersa na magkaisa para hadlangan ang pagdeklara ng martial law sa buong bayan at ang pagdausdos ng rehimen tungong diktadura.

 

Hindi ito panahon na maghati-hati pa tayo ng protesta at paglaban sa kontra-masang patakaran at nagbabantang diktadura ng rehimeng Duterte. Napatunayan sa maraming pagkakataon na habang hati-hati ang progresibong pwersa, patuloy na nagwawagi ang mga kontra-masang patakaran, kabilang na ang pagdakip, pagpatay at masaker sa mga tumututol sa gobyerno.

 

Kailangan ang tunay na nagkakaisang hanay o koalisyon para palakasin ang ating mga protesta at umani ng mga tagumpay, gaano man kaliit ito ngayon. Kailangan natin ito para bigyan ng pag-asa at direksyon ang masa na may natitira pang alternatiba kaysa sa rehimeng Duterte.

 

Sa kabataang milenyal, batid namin na hindi ninyo palalampasin ang pagtatangka na ibalik ang diktadura sa bansa. Panahon nang magpamalas na muli ng lakas. Lumabas sa inyong mga eskwelahan sa darating na mga araw. Magsama-sama tayo muli sa People Power Monument at iba pang mga lugar para harangan ang diktadura at wakasan ang martial law sa Mindanao!

 

24 July 2017

 

 

Last Updated on Wednesday, 29 November 2017 14:18
 

Announcements

plm_poster_congress_copy


Join the Campaigns!

 

anti-trpo icon

Anti Trapo Campaign!

 

Government of the Masses Campaign! icon

Government of the Masses Campaign!


Socialist_Feminism_Cover
Renewing Socialist Feminism

 

Visitors Counter

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday613
mod_vvisit_counterThis month13839

Your IP: 54.92.201.232
,
Today: Dec 13, 2017